NEWS

DILG: Mga tawag sa 911 inilipat muna sa mga local call center matapos magpositibo ang dalawang ahente sa COVID-19

September 1, 2020

Inilipat muna ng Department of the Interior and Local Government (DILG) ang mga tawag sa 911 sa mga local call center matapos magpositibo ang dalawang call agent sa COVID-19.

Ayon kay DILG Spokesperson and Undersecretary Jonathan Malaya, lahat ng kanilang mga Emergency Telecommunicator (ETC), pati ang sampung COVID Hotline agent ng Department of Health na nakatoka sa E911, ay naka-home quarantine bilang pag-iingat habang ang 911 National Call Center (NCC) ay nililinis at nilalagyan ng proper ventilation at isinasagawa ang contact tracing.

“Upang mapangalagaan ang kalusugan ng ating mga kawani, sinusunod namin ang ganitong pansamantalang palakad upang patuloy na mapaglingkuran ang publiko sa tulong ng mga call center na pinatatakbo ng mga local government units (LGU). Lahat ng aming mga kawani ay nagpa-PCR test at kasalukuyang naka-home quarantine. Sila ay babalik sa trabaho kapag nagnegatibo na ang kanilang test o sa oras na makumpleto nila ang 14-day quarantine,” ani Malaya.

“Dahil sa pandemya nahaharap tayo sa mga problemang technical, manpower at operational, pero inaayos na namin ang mga ito at umaasa kaming makapag-partially operate sa September 7 at muling magbukas sa September 16,” dagdag pa niya.

Ayon kay Malaya, magkakaroon dapat sila ng karagdagang 17 ETC mula sa Bureau of Fire Protection, isang DILG attached agency, na nagsagawa ng training sa buwang ito, subali’t dalawa sa kanila ay nagpositibo rin sa COVID-19, kaya ang kanilang pagsisimula ay sinuspinde, at sila ngayon ay naka-quarantine.

Ang E911 ay isang programang panseguridad at pangkaunlaran ng DILG na tumutugon sa at nagbibigay ng emergency assistance sa mga taong nasa peligro. Ang mga tumatawag dito ay karaniwang nangangailangan ng police assistance, mga fire report, emergency medical assistance, search and rescue, at mga may kinalaman sa chemical, biological, radiological, nuclear, and explosive (CBRNE) materials.

18 milyong tawag sa 80 ETC

Iniulat ni E911 Executive Director Diosdado Valeroso na bago pa nagkapandemya, inaasikaso na ng E911 hotline ang napakaraming mga tawag kahit 80 lamang ang kanilang mga ETC sa buong bansa na naghahali-halili 24 oras upang sumagot sa mga tawag.

Noong isang taon lamang, lumobo ang dami ng tawag sa 18.482 milyon mula sa 1.46 milyon noong 2016. Lalo pang dumagsa ang mga tawag nang tumanggap na ang E911 National Call Center ng mga COVID-related calls sa ilalim ng pakikiisa ng DOH na nagsimula noong Marso 17.

Ayon kay Valeroso, ang dalawang ETCs na nagpositibo sa COVID ay nagpapagaling at naka-isolate. “Ang balak namin ay ibalik ang aming mga agents, kasama ng mga DOH agents na nakatoka sa amin, kung ligtas na para sa kanila,” aniya.

Sa kabilang banda, ayon kay Malaya, sinusubok rin nila ang work-from-home para sa ilang mga kawani upang masagot ng E911 ang mga emergency calls at makapagpadala ng emergency responders kapag nauilt ang ganitong sitwasyon. “Pinaplantsa pa namin ang mga technical issue para sa WFH,” dagdag niya.

Samantala, aniya, mabagal ang pagtugon sa mga rerouted calls dahil walong local call centers lang ang humahawak sa mga ito.

Humingi ng pang-unawa ang tagapagsalita ng DILG, at nangakong muling magbubukas ang E911 sa oras na matiyak ang kaligtasan ng kanilang mga ETC.